भुटानी शरणार्थीको हत्या संलग्नमा ९ जना प्रहरी नियन्त्रणमा

झापा: झापा दमकको बेलडाँगीस्थित भुटानी शरणार्थी शिविरका ४६ वर्षीय लालबहादुर गुरुङको हत्यामा संलग्न ९ जनालाई प्रहरीले नियन्त्रणमा लिएको छ।

घटनामा उनीहरुको संलग्नता खुलिसकेको इलामका प्रहरी उपरीक्षक दिलिप घिमिरेले थाहा सञ्चार नेटवर्कलाई जानकारी दिए। उनीहरुको नाम, थर र ठेगानासहित अहिलेसम्म खुलेका तथ्य भोलि सार्वजनिक गरिने घिमिरेले बताएका छन्।

हिजो बुधबार दिउँसो खुकुरी प्रहारबाट गुरुङको मृत्यु भएको थियो। झापा र इलामको सीमा नजिक पर्ने रतुवाखोलाको पुलमा गुरुङमाथि अज्ञात समूहले खुकुरी प्रहार गरेका थिए। गुरुङको खुट्टा र हातमा गहिरो चोट लागेको थियो।

उनको बिर्तामोडस्थित बी एण्ड सी अस्पतालमा उपचारको क्रममा हिजै साँझ मृत्यु भएको हो। व्यक्तिगत रिसिबीका कारण हत्या भएको हुनसक्ने प्रहरीले प्रारम्भिक आँकलन गरेको छ।